រាជធានីភ្នំពេញ ៖ ស្ត្រីម្នាក់ជាប្រធានឥណទានធនាគារ ABA សាខាបុរីកីឡា ត្រូវបានត្រូវបាន កម្លាំងអធិការដ្ឋាន នគរបាលខណ្ឌ ៧មករា ឃាត់ខ្លួន ពាក់ព័ន្ធករណីបន្លំឯកសារ ដកលុយធនាគារ ABA ជាង ២៧ម៉ឺនដុល្លា វេលាម៉ោង ១៤និង០៦ នាទី ថ្ងៃទី០៩ ខែតុលា ឆ្នាំ២០២៣ ស្ថិតនៅចំណុចធនាគារABAបុរីកីឡា ផ្លូវ១៦៩ កែង១៣៤ ភូមិ១២ សង្កាត់វាលវង់ ខណ្ឌ៧មករា រាជធានីភ្នំពេញ ។
សមត្ថកិច្ច បានឲ្យដឹងថា ជនរងគ្រោះ ជាម្ចាស់បណ្តឹង ឈ្មោះ គ្រេង សុខជាតា ភេទស្រី អាយុ ៣១ឆ្នាំ ជាបុគ្គលិកធនាគារ ABA សាខាបុរីកីឡា ជាអ្នកតំណាងអោយ ធនាគារ ABA ស្នាក់នៅសង្កាត់អូរប្ញស្សីទី៤ ខណ្ឌ៧មករា រាជធានីភ្នំពេញ ។ ដោយឡែកជនសង្ស័យឈ្មោះ សារ សុគន្ធី ភេទស្រី អាយុ ៣៤ឆ្នាំ ជនជាតិខ្មែរ មុខរបរ ជាប្រធានឥណទាន ធនាគារ ABA សាខាបុរីកីឡា មានទីលំនៅ បន្ទប់លេខ១២C ជាន់ទី១២ ខុនដូររ៉ូយ៉ាល់ផាក សង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
សម្រាប់វត្ថុតាងចាប់យកមានដូចជា កិច្ចសន្យាសងប្រាក់ ៩០,៣៧៦,៩៤ ចំនួន ១សន្លឹក (ថតចំលង) ចុះថ្ងៃទី០៦ ខែតុលា ឆ្នាំ២០២៣, លិខិតទទួលស្គាល់ប្រាក់ ដែលដកពីធនាគារ ០១សន្លឹក (ថតចំលង) ចុះថ្ងៃទី០៩ ខែតុលា ឆ្នាំ២០២៣, របាយការណ៍គណនេយ្យចំនួន ៥សន្លឹក (ថតចំលង)។ សម្ភារបាត់បង់៖ ប្រាក់ចំនួន ២៧០,៣៧៦,៩៤ (ម្ភៃប្រាំពីម៉ឺនបីរយចិត្តសិបប្រាំមួយនឹងកៅបួនសេន) ។ បច្ចុប្បន្ន ជនសង្ស័យកំពុងឃាត់ខ្លួន នៅអធិការដ្ឋាននគរបាលខណ្ឌ៧មករា ដើម្បីកសាងសំណុំរឿង បញ្ជូនទៅសាលាដំបូង រាជធានីភ្នំពេញចាត់ការតាមនីតិវិធីច្បាប់៕